山系小故事 - 愛植物的女孩

👩🏻： 呢個係大紅花，係中國嘅國花！

👨🏻： 中國嘅國花係大紅花咩？

👨🏻： 香港嘅國花係乜嘢？好似係杜鵑？

👩🏻： 乜嘢啊？洋紫荊下嘛？！

👨🏻： 係喎！記錯晒添！呢啲淨係呃到啲冇常識嘅人，呃你唔到添～ 哈哈...

男人大概30多歲，平日返Office工嘅佢，今日穿咗一身俐落嘅運動裝，為嘅都係陪心儀女同事去行山。佢知道女孩鍾意大自然，鍾意戶外活動，所以縱使對於流汗不太熱衷，但佢依然早幾日收工後刻意去咗商場運動服裝舖頭，趁着大減價，買咗條運動褲和行山鞋，上身衫就著佢平日鍾愛嘅波衫。

女孩20多歲，明顯比男人細一截，從事會計，皮膚稍為黝黑，但平日著OL衫返工就完全唔似戶外活動嘅人。每日返工營營役役，但就對於植物特別鍾愛，晩飯後夜闌人靜時，會喺書櫃拎本植物圖鑑來翻閱，所以對於喺大自然見到嘅植物都特別熟悉，隨手就能夠說出植物嘅名稱，心入面亦都清楚佢嘅生境、生長習性，開花結果期，同埋葉子、果實、花朵等等嘅特徵。

女孩一直長期患鼻敏感，因為自小居於空氣受污染嘅工廠區。呢幾日天氣轉涼，體感溫度大減，固然是喜訊，但空氣中積存的污染物，令佢呢幾日鼻敏感發作得特別嚴重，放假都唔想留喺屋企。但係，週末只要來到山上，鼻敏感便不藥而癒了，因此一到週末佢就只想到戶外地方去。走過山間，秋涼乾爽嘅天氣讓溪澗只剩下小小的水柱。路上睇到一片鋸齒型嘅葉子，經已讓佢念念不忘，佢將葉子的形狀記在心裏，心諗今晚一定要返屋企翻閱圖鑑，睇吓嗰棵係咩植物。佢唔能夠接受自己喺山上見到但叫唔出植物嘅名字。就如有時返工同事叫唔出佢嘅名字一樣，佢覺得係對植物嘅唔尊重。

男人見佢若有所思嘅模樣，不明所以，唔知佢有咩心事。雖然佢哋已經做咗同事2年，但女孩一直同佢保持距離，週末約佢去打卡餐廳食飯都經常被拒於千里之外。即使偶爾難得約倒佢，但每次同佢約會，女孩都總係心神恍惚，都唔知道佢諗緊啲乜嘢。佢一直想打開女孩嘅心扉。假如佢知道女孩原來諗緊路上睇到嘅係咩植物，一定會被佢激死吧！

走着走着，明明迎面撞到幾個山友，但大家彼此都不說話，亦無打招呼。哩種怪異嘅沉靜令佢哋都覺得有啲唔自在。可能係因為幾年來病毒會經飛沬傳播而搞到大家都唔敢除咗口罩亂講嘢吧？但咁都總比嗰啲高談闊論嘅大媽好吧？無論屋企事無大小都拎出嚟高談闊論，而且大聲得成個山頭都聽到，真係神憎鬼厭。為咗令氣氛緩和，男人就率先開腔：「呀！呢個果實咁得意，唔知係乜嘢植物呢？」講完，就嘗試伸手去摸。「唔好呀！」女孩大叫。「呢個係有毒㗎，雖然個樣好似平時食嘅橙，但其實係有毒嘅山橙啊。」男人大驚，即刻縮返埋隻手，佢當然唔想成為新聞中經常睇到誤食郊野果實中毒入院嘅人喇。男人尷尬地笑笑：「呀，原來你對植物都好有認識喎！你點識咁多嘢㗎？你唔係讀會計㗎咩？」女孩驚呆並猶豫咗一吓，就鼓起勇氣同男人講：「係呀，我好鍾意睇植物，工餘時間經常睇植物圖鑑。我係咪好奇怪？哈哈～ 」女孩意圖想以笑遮醜。「唔會呀，只要你有興趣嘅嘢，我都有興趣，之前都無乜留意山上有咩植物，下次可以借本圖鑑俾我睇吓嗎？」女孩開心地笑了。

「希望是個好的開始吧？」女孩心想。講到要鼓起勇氣似乎有點誇張，但只要佢諗起上一次拍拖嘅經驗，被男孩嫌棄佢哩個興趣後，佢就唔太敢隨便話比人知自己嘅喜好。始終好似同主流社會大眾嘅喜好有啲出入吧？大家平日好似都只會吃喝玩樂，行街買衫食飯打牌，但佢一啲興趣都冇。後來佢從朋友口中得知原來前男友瞞住自己一腳踏兩船，被騙幾個月，而嫌棄自己嗜好古怪似乎只係掩飾佢惡行嘅藉口。所以女孩都唔知應唔應該將自己哩個喜好話比其他人知，亦唔知其他人會點睇佢。喺香港做個平凡嘅會計妹，佢只係想平平淡淡過日子，每日準時放工，週末可以做吓自己鍾意做嘅嘢，咁就已經好開心。同事朋友親戚都曾經問佢會唔會移民，但佢都唔知自己可以去邊、應該去邊。佢只係想留喺香港。香港交通便利，搭半個鐘車就可以去行山，穿梭於山野同城市之間，係一件幾咁令外國人羨慕嘅事。週末遊走於山野間，抬頭望吓天，一隻小鳥吱吱地飛過，樹影婆娑，微風飄蕩，漸漸撫慰咗佢受情傷嘅心。其他人或許者會嫌棄佢，但佢知道山和植物唔會，所以佢好鍾意去行山睇植物。傷心困倦嘅時候上山睇吓花開得燦爛嘅植物，已經能令佢感到安慰。每逢週末上山，佢都倍感安心，甚至比遊走於市區經常要用app出入更安心。山，包容咗佢，隨時隨地都歡迎佢，所以佢希望另一半都係個真心鍾意山嘅人。

「嘩！好熱呀，乜成10月晏晝都三十幾度？！不如我哋落山high tea啦！」男人邊講邊掏出一包濕紙巾嚟抹汗。

「唔...都係唔好啦，我晏啲約咗人。不如同你去搭車？你認唔認得路？」女孩溫柔地微笑著。

佢慶幸山野讓佢眼睛都好似變得雪亮起嚟。