東平洲 - 香港的馬爾代夫!(上)
東平洲真的好美水清沙幼
又有稀有岩石 極具研究價值
還有全港獨有的岸蛁蟟蟬
稱之為香港的馬爾代夫都絕不為過!
大部份跟旅行團既人都會上島後向左行, 今次我和友人二人出發, 就決定往右邊出發, 發覺收獲似乎比跟團食大餐更豐富!
來回船飛每位$90, 在碼頭搵一位代表排隊買飛就可以喇
沿途經過科學園、觀音像等,又會見到一些船和水警等
之後就經過船灣淡水湖,岸邊有不少人垂釣呢
然後經過一帶圍了色彩豐麗既浮泡,唔知有咩用既呢?
眺望大陸
搭大概粒半鐘船,就來到傳說中既東平洲啦!(都唔會暈船浪,至少我無,但我都唔係經常暈船浪既人)
一落船,已經見到水好清的碼頭,心曠神怡人都醒D!
一望落水,水就清到肉眼都睇到一群魚仔經過,好正!
亦有位爸爸帶住囝囝撐獨木舟,哩D身教真心讚!
定一定神後,驚覺碼頭突然塞滿人,大部份人都向左行,此時我地決定右轉,搏一搏!
轉個灣已經見到哩個咁靚既沙灘,遠睇都夠哂靚喇!
你能夠相信眼前哩度係香港嗎?
沿住路再向前行5分鐘倒,就來到2間士多,我們幫襯了哩間新昌,食個早餐先
還有中秋燈籠裝飾呢
哩度我會用「抵食夾大件」來形容,事關佢一杯野飲$20,大杯過貢茶!喺哩個天氣哩個環境真係一流
哩度仲有新鮮海膽炒飯食,成盤擺係度任你睇
哩度仲有租浮潛用品,幾十蚊一日,都好抵呀
都好多人係度租出去沙灘浮潛
仲有人租埋隔離間屋過夜,入面放了好多張帆布床,但唔知幾錢呢
食飽就繼續行喇,此時就來到沙灘和石灘
用水清沙幼來形容,真係一點都唔過份
加上到訪當日勁好天,藍天白雲加海灘,如果唔係要趕船,我覺得我可以係度HEA一日!
無得彈呀!!!
由於太靚,所以係度影相都玩左好耐
之後就來到石灘
哩度岩石好特別,係地質公園特色之一,而且經大自然風化,所以紋理亦好特別
雖然我唔係咩地理專家,亦唔識分咩岩石打咩岩石,但都好好奇咁玩左好耐
加上繼續望住個咁清既海,真係睇幾耐都唔厭架
再穿過一D有樹蔭既路後 (都係平路多)
就來到斬頸洲
有個咁既名係因為個度係畀海浪長期侵蝕先會斷開兩邊,好似畀人斬頸咁,先會有個咁既名
(旅程太多野要分享,待續!)